सिद्धलेक गाउँपालिका-१ स्थित बाँजोगरा खेल मैदानमा जारी ‘प्रथम सिद्धलेक म्हेन्दोमाया कप, ९ ए साइड खुल्ला फुटबल नकआउट प्रतियोगिता’ अन्तरगत आज सेमिफाइनलका खेल हुँदै छ।
फाइनल प्रवेशका लागि आज पहिलो सेमिफाइनल खेलमा सिद्धलेक वारियर र म्हेन्दोमाया युवा समाज टिम ‘सि’ भिड्ने छन् भने दोस्रो सेमिफाइनल खेलमा म्हेन्दोमाया युवा समाज टिम ‘ए’ र चक्रदेवी सेवा समाज भिड्ने छन् ।
खेल दिउँसो १ बजेबाट सुरु हुने आयोजक क्लबका अध्यक्ष पेमा छिरिङ लामाले बागमती कलमलाई जानकारी दिनुभयो ।
मंगलबार भएको समूह चरण र क्वाटरफाइनल खेलमा सिद्धलेक वारियरले NKUYC लाई २-० ले गोल अन्तरले पराजित गर्यो भने म्हेन्दोमाया युवा समाज टिम ‘बि’ लाई म्हेन्दोमाया युवा समाज टिम ‘सि’ ले ६-० गोल अन्तरले पराजित गर्दै सेमिफाइनल प्रवेश गरेको थियो ।
त्यस्तै चक्रदेवी सेवा समाजले फोरजी गुरुङ कल्बलाई २-१ गोल अन्तरले पराजित गर्दै सेमिफाइनलमा स्थान बनायो भने बागबच्छला युवा क्लबलाई म्हेन्दोमाया युवा समाज टिम ‘ए’ ले ३-० गोल अन्तर र सिद्धलेक वारियरले सपोट धादिङ फुटबल एकेडेमीलाई २-० गोल अन्तरले पराजित गर्दै सेमिफाइनलमा स्थान बनायो।
म्हेन्दोमाया युवा समाज सिद्धलेक-१, नयाँबस्तीको आयोजना तथा सिद्धलेक गाउँपालिकाको सहआयोजनामा भएको प्रतियोगितामा १० टिम सहभागी थिए।
फाईनल खेल ९ गते दिउँसो २ बजे हुने आयोजकले जनाएको छ ।
प्रतियोगिताको विजयी हुने टिमले रु १ लाख नगदसहित ट्रफी, मेडल र प्रमाणपत्र प्राप्त गर्नेछन् भने उपविजेताले रु ५० हजार नगदसहित ट्रफी, मेडल र प्रमाणपत्र पाउनेछन् ।
यसैगरी सेमिफाइनल पुग्ने टोलीले समान रु १५/१५ हजार प्राप्त गर्ने आयोजकले जनाएको छ ।
विजयी टिमले पाउने नगद रकममा कुनै करकट्टी नहुने क्लबका अध्यक्ष लामाले बताउनुभयो ।
धादिङ आवाज डट कम - विकास विचार र ताजा समाचारको स्वतन्त्र खुराक
