धादिङ । जिल्ला प्रशासन कार्यालय धादिङले जिल्लाभित्र रहेका सबै इजाजत प्राप्त हातहतियार तथा खरखजना बुझाउन आग्रह गरेको छ।
जिल्ला प्रशासन कार्यालयले शुक्रबार सूचना जारी गर्दै आगामी मिति २०८२ फागुन २१ गते हुन गइरहेको प्रतिनिधिसभा सदस्य निर्वाचनलाई शान्तिपूर्ण, भरपर्दो र विश्वसनीय बनाउन जिल्लाभित्र रहेका सबै इजाजत प्राप्त हातहतियार तथा खरखजना २०८२ माघ १५ गतेभित्र बुझाउन आग्रह गरेको छ।
इजाजत प्राप्त हातहतियार राख्ने व्यक्तिहरूले ती हातहतियार जिल्ला प्रहरी कार्यालय धादिङ वा नजिकको प्रहरी इकाइमा बुझाउनुपर्ने सूचनामा उल्लेख छ।
प्रहरी इकाइमा बुझाइएका हातहतियारहरू निर्वाचन प्रक्रिया सम्पन्न भएपछि सम्बन्धित धनीले फिर्ता प्राप्त गर्न सक्ने जनाइएको छ।
सूचनाको अवज्ञा गरी हातहतियार नबुझाएको वा दुरुपयोग भएको पाइएमा प्रचलित कानून बमोजिम कारबाही गरिने सहायक प्रमुख जिल्ला अधिकारी मोहन प्रसाद न्यौपानेद्वारा जारी सूचनामा उल्लेख गरिएको छ ।
धादिङ आवाज डट कम - विकास विचार र ताजा समाचारको स्वतन्त्र खुराक
