काठमाण्डौ । मलेखु–मुग्लिन सडक खण्ड आजदेखी असार ७ गतेसम्म राति साढे चार घण्टा बन्द हुने भएको छ ।
नागढुङ्गा–मुग्लिन सडक योजना पश्चिम खण्डले सूचना निकालेर पृथ्वी राजमार्ग अन्तर्गत मलेखु–मुग्लिन सडक खण्डमा रहेको बार्बाङ खोला, मोवा खोला, खटौती खोला र गोमती खोलामा आरसीसी बिम राख्ने काम भइरहेकोले असार ७ गतेसम्म रातिको समयमा सडक बन्द गर्न लागिएको जानकारी गराएको हो ।
राति साढे १० बजेदेखि बिहान ३ बजेसम्म सडक बन्द रहने सूचनामा भनिएको छ ।
मुग्लिनबाट मलेखुतर्फ गुड्ने ठूला गाडीलाई मुग्लिन र साना गाडीलाई कुरिनटारमा रोकिने सूचनामा उल्लेख छ । यस्तै मलेखुबाट मुग्लिनतर्फ गुड्ने गाडीमध्ये ठूला गाडी मलेखु र साना गाडी शीतल बजारमा रोकिनेछन् ।
गाडी रोकिएको ठाउँबाट बिहान ३ बजेमात्रै अगाडि बढ्न दिने पनि सूचनामा उल्लेख छ ।
धादिङ आवाज डट कम - विकास विचार र ताजा समाचारको स्वतन्त्र खुराक
