धादिङ । धादिङ जिल्ला भलिबल संघले काठमाडौंको नैकापमा रहेको न्यु डायमन्ड क्लबका प्रशिक्षक कुमार राईलाई सम्मान गरेको छ ।
धादिङबेशीमा जारी ‘स्व.मनोज श्रेष्ठ स्मृति कप २०८२’ बागमती प्रदेश स्तरीय महिला भलिबल प्रतियोगिताको अवसरमा शुक्रबार प्रशिक्षक राईलाई नगद र प्रशंसा पत्रसहित सम्मान गरिएको हो ।
सम्मान ग्रहणपछि प्रतिक्रिया दिँदै प्रशिक्षक कुमार राईले नेपाली महिला भलिबल खेलाडीले एक दिन अन्तर्राष्ट्रिय मञ्चमा मुलुकको शिर उच्चो पार्ने विश्वास व्यक्त गर्नुभयो ।
उहाँले महिला खेलाडीको क्षमता, मेहनत र अनुशासनमा आफूलाई पूर्ण भरोसा रहेको उल्लेख गर्दै त्यस लक्ष्यका लागि निरन्तर लागिरहने प्रतिबद्धता जनाउनुभयो । राईले २०६४ सालदेखि महिला भलिबलको विकासमा संघर्ष गर्दै आएको स्मरण गर्दै सीमित स्रोत, पूर्वाधारको अभाव र आर्थिक चुनौतीका बाबजुद पनि आफू कहिल्यै हतोत्साहित नभएको बताउनुभयो ।
“महिला खेलाडीलाई अवसर, उचित प्रशिक्षण र प्रोत्साहन दिन सकिए उनीहरूले जुनसुकै स्तरमा पनि उत्कृष्ट प्रदर्शन गर्न सक्छन्,” उहाँले भन्नुभयो ।
उहाँले धादिङसहित विभिन्न जिल्लाबाट आएका महिला खेलाडीहरूलाई राष्ट्रिय तथा अन्तर्राष्ट्रिय स्तरमा पुर्याउने आफ्नो सपना अझै अधुरो रहेको उल्लेख गर्दै त्यसलाई पूरा गर्न निरन्तर मेहनत गर्ने बताउनुभयो । साथै, महिला खेलाडीलाई सम्मान, हौसला र निरन्तर सहयोग मिलेमा नेपाली महिला भलिबलले नयाँ उचाइ हासिल गर्ने विश्वास व्यक्त गर्नुभयो ।
राईको प्रशिक्षणमा रहेका धादिङका रेविका लामा तामाङ, भावना तामाङ, सलिना गुरुङ लगायत अन्य खेलाडीहरु हाल यस जारी प्रतियोगितामा खेलि रहेका छन् ।
राई न्यु डायमन्डको प्रशिक्षक भएर महिला भलिबल टोलीलाई राष्ट्रिय स्तरका प्रतियोगितामा सफलता दिलाउनुभएको छ ।क्लबले नेपाल भलिबल संघद्वारा आयोजित प्रतियोगिताहरूमा उपाधि समेत हासिल गरेको छ।
वर्षौंदेखि महिला भलिबलको विकासमा महत्वपूर्ण योगदान दिँदै आउनुभएका राईले सीमित स्रोत, आफ्नै कोर्टको अभाव र आर्थिक कठिनाइका बाबजुद राष्ट्रिय स्तरका महिला भलिबल खेलाडीहरु उत्पादन गर्न सफल हुनुभएको छ ।
प्रशिक्षक राईलाई १२ गते समापनको दिन सम्मान गर्ने कार्यक्रम तय भएको भएपनि उहाँको कार्यव्यस्तताका कारण शुक्रबारनै सम्मान गरिएको धादिङ भलिबल संघका अध्यक्ष अमृत गुरुङले जानकारी दिनुभयो ।
गुरुङका अनुसार संघले यस प्रतियोगिता समापनको दिन राष्ट्रिय भलिबल खेलाडी शरण सामरी, रविन नगरकोटी, भावना तामाङ, रेविका तामाङ लगायतलाई पनि सम्मान गर्ने कार्यक्रम रहेको छ।
धादिङ आवाज डट कम - विकास विचार र ताजा समाचारको स्वतन्त्र खुराक
