धादिङ । बेनिघाट रोराङ गाउँपालिका–२ होवाङबाट दुई नाल भरुवा बन्दुकसहित दुई जना पक्राउ परेका छन् ।
विशेष सूचनाको आधारमा शुक्रबार बिहान करिब ४ बजे इलाका प्रहरी कार्यालय गजुरीबाट खटिएको प्रहरी टोलीले होवाङ क्षेत्रमा खानतलासी अभियान सञ्चालन गरेको थियो ।
प्रहरीले स्थानीय २८ वर्षीय विराज तामाङको घरमा खानतलासी गर्दा लुकाइछिपाइ राखिएको अवस्थामा एक थान भरुवा बन्दुक बरामद गरेको जनाएको छ ।
त्यस्तै सोही ठाउँका २८ वर्षीय सानो कान्छा तामाङको घरमा शंकाको आधारमा गरिएको खानतलासीका क्रममा अर्को एक थान अवैध भरुवा बन्दुक फेला परेको प्रहरीले जानकारी दिएको छ ।
बरामद भएका दुवै बन्दुक नियन्त्रणमा लिई प्रहरीले दुवै जनालाई तत्काल पक्राउ गरेको जनाएको छ ।
पक्राउ परेका विराज तामाङ र सानो कान्छा तामाङविरुद्ध हातहतियार तथा खरखजाना सम्बन्धी कसुरमा मुद्दा दर्ता गरी जिल्ला अदालत धादिङमा पेश गरिएको जिल्ला प्रहरी कार्यालय धादिङका सूचना अधिकारी प्रहरी नायव उपरीक्षक प्रकाश दाहालले जानकारी दिनुभयो ।
धादिङ आवाज डट कम - विकास विचार र ताजा समाचारको स्वतन्त्र खुराक
