काठमाण्डौ । नेपाली युवालाई भारत लगी मृगौला निकालेर बिक्री गर्ने तीन जना पक्राउ परेका छन् ।
पक्राउ पर्नेमा नुवाकोटका समिर नेपाली, राकेश नेपाली र काभ्रेका राज कुमार परियार रहेको नेपाल प्रहरी मानव बेचबिखन विरुद्धको ब्यूरोका प्रवक्ता प्रहरी उपरीक्षक नरेन्द्र कुँवरले जानकारी दिनुभयो ।
पक्राउ पर्ने तीनै जनाले भारतको नयाँ दिल्लीको चण्डिगढ र नोयडा लगायतका ठाउँमा लगेर मृगौला बिक्री गर्ने गरेको प्रहरीले जनाएको छ ।
ब्यूरोका प्रवक्ता कुँवरका अनुसार गिरोहले हरेक व्यक्तिलाई पाँचदेखि सात लाख रुपैयाँ दिने प्रलोभन देखाएर भारत पुर्याउने गरेका थिए । गिरोहले आर्थिक अवस्था कमजोर भएका युवालाई लक्षित गरी धन्दा चलाएको पाइएको छ ।
जिल्ला अदालत काठमाण्डौबाट तीनैजनालाई हिरासतमा राखेर थप अनुसन्धान गर्न प्रहरीले एक हप्ताको म्याद लिएको छ ।
मृगौला निकालिएका केही व्यक्ति प्रहरीको सम्पर्कमा आएपछि प्रहरीले थप खोजी गरेको थियो ।
धादिङ आवाज डट कम - विकास विचार र ताजा समाचारको स्वतन्त्र खुराक
