धादिङ । विद्यालय शिक्षा विधेयक सच्याउन माग गर्दै धादिङको शिक्षा विकास तथा समन्वय इकाई कार्यालयमा शिक्षकहरुले धर्ना दिएका छन् ।
आईतबार नेपाल शिक्षक महासंघको केन्द्रिय सर्कुलर अनुसार शिक्षा विकास तथा समन्वय इकाईमा धर्नासहित ध्यानाकर्षण पत्र बुझाउने कार्यक्रम बमोजिम जिल्लाका शिक्षकहरुले धर्ना दिएका हुन् ।
चरणबद्ध आन्दोलनरत शिक्षकहरुले आइतबार शिक्षा विकास तथा समन्वय इकाई कार्यालयका प्रमुख भुमिलाल शर्मा सुवेदीलाई ध्यानाकर्षण पत्र बुझाएका हुन् ।
नेपाल सरकारसँग भएको सहमति कार्यान्वयन नभएको भन्दै नेपाल शिक्षक महासङ्घको आह्वानमा पुनः आन्दोलन थालेका शिक्षकहरुले यसअघि गाउँपालिका तथा नगरपालिकाको कार्यालयमा धर्नामा बसेर ध्यानाकर्षण पत्र बुझाएको नेपाल शिक्षक महासंघ धादिङका अध्यक्ष ठान प्रसाद बसौलाले बताउनुभयो ।
विद्यालय, विद्यार्थी र शिक्षक–कर्मचारी मैत्री शिक्षा ऐन जारी गरिनुपर्ने माग गर्दै गत वर्ष विभिन्न चरणमा ८९ दिनसम्म आन्दोलन भएको थियो । ०८१ चैत २० गतेदेखि २९ दिनसम्म काठमाडौँ केन्द्रित शैक्षिक सडक आन्दोलन चलेपछि ०८२ वैशाख १७ मा नेपाल सरकार र महासङ्घबिच नौ बुँदे सहमति भएको थियो ।
०८२ असार १५ गतेभित्र विद्यालय शिक्षा विधेयक प्रतिनिधि सभाबाट पारित गराउने र उक्त ऐनमा शिक्षकका मागहरू सम्बोधन हुने भनिएको थियो । तर सहमति अनुसार सरकारले काम नगरेको भन्दै शिक्षक महसंघले पुनः आन्दोलनका कार्यक्रमहरू सार्वजनिक गरेसँगै शिक्षकका पेसागत सङ्घ सङ्गठनहरू एकजुट भएर महासङ्घको नेतृत्वमा आन्दोलन सुरु भएको हो ।
धादिङ आवाज डट कम - विकास विचार र ताजा समाचारको स्वतन्त्र खुराक
