काठमाण्डौ । जिल्ला प्रशासन कार्यालय काठमाण्डौले काठमाण्डौको चक्रपथ क्षेत्रभित्र अहिले बिहान साढे आठ बजेदेखि भोलि बिहान साढे पाँच बजेसम्मका लागि कर्फ्यु लगाइएको छ ।
प्रशासनले सूचना निकालेर काठमाण्डौ महानगरपालिकाभित्र पर्ने चक्रपथ क्षेत्रमा भोलि बिहान साढे पाँच बजेसम्म चार किल्ला तोकेर ती क्षेत्रभित्र कुनै पनि प्रकारको सभा, जुलुस, प्रदर्शन, भेला, बैठक तथा आवत–जावत गर्न नपाइने उल्लेख गरिएको छ ।
कर्फ्यु लगाएका क्षेत्रहरुमा चक्रपथ भित्रका कोटेश्वर, सिनामङ्गल, गोङ्गबु, चाबहिल, नारायणगोपाल चोक, गौशाला, बालाजु, स्वयम्भू, कलङ्की, बल्खु हुँदै बागमती नदीसम्मको क्षेत्र छन् ।
निषेधाज्ञा अवधिभर पनि अत्यावश्यक सेवाका गाडीहरु चल्न पाउनेछन् । एम्बुलेन्स, दमकल, शववाहन, स्वास्थ्यकर्मी, सुरक्षाकर्मी, पत्रकार, पर्यटकका गाडी, मानव अधिकार तथा कूटनीतिक नियोगका गाडी, हवाई टिकट देखाएर जाने यात्रुहरू लाई गन्तव्यमा जाने दिने सूचनामा भनिएको छ ।
साथै नागरिकहरूलाई कर्फ्युको पालना गर्न अनुरोध गरिएको छ ।
यसैगरी ललितपुरका केही ठाउँमा आज बिहान ७ बजेदेखि राति १२ बजेसम्म कर्फ्यु लागेको छ ।
ललितपुर प्रशासनले मन्त्री निवास रहेको भैंसेपाटी क्षेत्र, एमाले पार्टी कार्यालय रहेको च्यासल क्षेत्र र काङ्ग्रेस पार्टी कार्यालय रहेको सानेपा क्षेत्रमा बिहान ७ बजेदेखि राति १२ बजेसम्म कर्फ्यु आदेश जारी गरेको हो ।
ललितपुरको वडा नम्बर ४, १८ र २५ का क्षेत्रहरु भैंसेपाटीबाट बुङ्गमती जाने सडक, सिजी हाउजिङबाट चोभार गल्छी सडक, एकान्तकुनाबाट विष्णुदेवी मन्दिर र इटनी जाने ओह्रालो क्षेत्रमा कर्फ्यु जारी गरेको छ ।
यसैगरी वडा नम्बर २ सानेपाको इन्द्रायणी मार्ग वरपरपरको ठाउँहरु, सानेपा चोकदेखि इन्द्रायणी सडक, बल्खु पुलदेखि मनमोहनपार्क र इन्द्रायणी मन्दिरबाट बागमती करिडोरसम्म पनि कर्फ्यु जारी भएको छ ।
वडा नम्बर ९ को च्यासल क्षेत्रमा च्यासल रङ्गशाला मलपोखरी जाने बाटो र मनोहरा खोला जाने बाटोमा पनि कर्फ्यु लगाएको छ ।
filephoto
धादिङ आवाज डट कम - विकास विचार र ताजा समाचारको स्वतन्त्र खुराक
