धादिङ । देशका विभिन्न कारागारबाट भागेका ४७ जना कैदी बन्दीलाई धादिङबाट नियन्त्रणमा लिइएको छ ।
जेन–जी आन्दोलनको अराजक वातावरणको मौका छोपेर फरार भएका मध्ये बिहीबार तीन महिला सहित ४७ जना कैदी बन्दीलाई नियन्त्रणमा लिएर नुवाकोट पठाइएको प्रमुख जिल्ला अधिकारी विजयराज सुवेदीले जानकारी दिनुभयो ।
उहाँका अनुसार पक्राउ परेका मध्ये कारागार कार्यालय जगन्नाथदेवलका २९ जना, नख्खु कारागारका १३ जना, भीमफेदी कारागारका ४ जना र तनहुँ कारागारका १ जना रहेका छन्।
नियन्त्रणमा परेका ३ जना महिला पनि जगन्नाथदेवलकै भएको पुष्टि भएको छ।
बुधबारदेखि नै पृथ्वीराजमार्गका विभिन्न स्थानमा नेपाली सेनाले कडाइका साथ चेकजाँच सुरु गरेको छ। बुधबार मात्र धादिङको गल्छी बैरेनीबाट तीन जना फरार कैदी पक्राउ परेका थिए ।
सवारीसाधन प्रयोग गर्ने वा पैदल हिँड्ने सबैलाई जाँच गरी सोधपुछ गर्ने गरिएको गजुरीस्थित भैरवनाथ गणका कर्णेल अशिम श्रेष्ठले जानकारी दिनुभयो ।
गोप्य सूचनाका आधारमा समेत केहीलाई नियन्त्रणमा लिएको उहाँले बताउनुभयो । तस्विर:अर्जुन श्रेष्ठ
धादिङ आवाज डट कम - विकास विचार र ताजा समाचारको स्वतन्त्र खुराक
