काठमाण्डौ । नागढुङ्गा–मलेखु सडकखण्ड आज र भोलि बन्द नहुने भएको छ ।
स्तरोन्नतिको लागि बुधबारदेखि दैनिक पाँच घण्टा आंशिक बन्द भइरहेको सडकखण्ड आज र भोलिका लागि भने खुला रहने नागढुङ्गा–मुग्लिन सडक आयोजनाले जनाएको छ ।
आयोजनाका अनुसार नेकपा (एमाले) को ११औँ केन्द्रीय महाधिवेशन उद्घाटन सत्रलाई ख्याल गर्दै सडकमा आवतजावत खुलाइएको हो ।
त्यसपछि भने कार्यतालिकाअनुसार तोकिएको समयमा सडक बन्द गरेर काम गरिने आयोजनाले जनाएको छ ।
पुस १ गतेसम्म नागढुङ्गादेखि पिप्लामोडसम्म र पोखरेभिर क्षेत्रमा बिहान १०ः३० बजेदेखि दिउँसो ३ः३० बजेसम्म सडक आवागमन बन्द गरेर सडक स्तरोन्नति गर्ने कार्यतालिका छ ।
सडक विभागले काठमाण्डौ जिल्लाभित्र पर्ने नागढुङ्गा–पिप्लामोड खण्डको कालोपत्र गर्ने कामलाई उच्च प्राथमिकतामा राखेको छ भने धादिङ जिल्लाभित्र पर्ने नौबिसे–मलेखु खण्डको बाङ्गेभीरमा सडक चौडा गर्ने कामलाई महत्त्वका साथ अघि बढाएको छ।
धादिङ आवाज डट कम - विकास विचार र ताजा समाचारको स्वतन्त्र खुराक
