काठमाडौं । काठमाडौंमा टिपरले मोटरसाइकललाई ठक्कर दिँदा एक जना गम्भीर घाइते भएका छन्।
गएराति १२:४५ बजे काठमाडौं महानगरपालिका-३ नारायणगोपाल चोकनजिक नयाँ बसपार्कबाट जाँदै गरेको बा ४ ख १२०३ नम्बरको टिपरले विपरीत दिशाबाट आउँदैं गरेको बा प्र-०२-०४१ प ३९३८ नम्बरको मोटरसाइकल आपसमा ठोक्किदा मोटरसाइकल चालक धादिङको गजुरी गाउँपालिका-७ का २० वर्षीय दर्तामान तामाङ गम्भीर घाइते भएको काठमाडौं प्रहरी परिसरका प्रवक्ता एसपी अपिलराज बोहराले जानकारी दिनुभयो ।
उनको सिनामंगलस्थित केएमसी अस्पतालमा उपचार भइरहेको छ। उनको निधार, घाँटी र नाकमा चोट लागेको पनि प्रहरीले जनाएको छ।
दुर्घटनाको प्रारम्भिक अनुसन्धानबाट दार्तारामले चलाएको मोटरसाइकल चोरीको भएको पाइएको एसपी बोहराले जानकारी दिनुभयो ।
दार्तारामले गएराति नै शंखरापुर नगरपालिका-७ साँखुबाट उक्त मोटरसाइकल चोरी गरेको भेटिएको छ।
मोटरसाइकल धनी अनील स्याङ्बो सम्पर्कमा आइसकेको प्रहरीले जनाएको छ।चोरी गरेर भाग्दै गर्दा मध्यराति दुर्घटना भएको प्रहरीले जनाएको छ। दुर्घटनापश्चात टिपर चालक भने फरार छन्।
टिपरका साहु नुवाकोट ककनी गाउँपालिका-२ का उत्तम घिमिरे सम्पर्कमा आएको एसपी बोहराले बताउनुभयो ।
धादिङ आवाज डट कम - विकास विचार र ताजा समाचारको स्वतन्त्र खुराक
